मुंबई – बॉलीवूडचे दिग्गज अभिनेते आणि हिंदी चित्रपटसृष्टीतील “ही-मॅन” म्हणून ओळखले जाणारे धर्मेंद्र यांचे निधन झाले आहे. ते ८९ वर्षांचे होते. वृत्तसंस्था IANS यांनी दिलेल्या माहितीनुसार, गेल्या काही दिवसांपासून प्रकृती अस्वस्थ असल्याने त्यांना मुंबईतील ब्रीच कँडी रुग्णालयात दाखल करण्यात आले होते. उपचार सुरू असताना त्यांनी अखेरचा श्वास घेतला.
धर्मेंद्र यांच्या प्रकृतीत सुधारणा झाल्यानंतर १२ नोव्हेंबर रोजी त्यांना रुग्णालयातून डिस्चार्ज देण्यात आला होता. त्यानंतर घरच्या घरी उपचार सुरू असल्याची माहिती कुटुंबीयांनी दिली होती. पुढील महिन्यात—८ डिसेंबरला—ते आपला ९० वा वाढदिवस साजरा करणार होते. कुटुंबीयांनी यासाठी विशेष तयारीही केली होती. मात्र त्याआधीच त्यांच्या निधनाची बातमी समोर येणे धक्कादायक ठरले आहे.
या महिन्याच्या सुरुवातीला ते रुग्णालयात दाखल झाल्यानंतर सोशल मीडियावर त्यांच्या निधनाच्या खोट्या अफवा पसरल्या होत्या. याबाबत कुटुंबीयांनी तीव्र नाराजी व्यक्त केली होती.
धर्मेंद्र यांनी तब्बल ६५ वर्षांच्या कारकिर्दीत ३०० हून अधिक चित्रपटांमध्ये काम केले. देखणे व्यक्तिमत्त्व, आकर्षक अभिनयशैली आणि दमदार अॅक्शन भूमिकेमुळे ते हिंदी चित्रपटसृष्टीतील सर्वांत लोकप्रिय अभिनेत्यांपैकी एक झाले. त्यांच्या निधनाने भारतीय चित्रपटसृष्टीने एक सुवर्णयुग गमावले असल्याची भावना व्यक्त केली जात आहे.