जळगाव । राज्य निवडणूक आयोगाने २९ महानगरपालिकांच्या सार्वत्रिक निवडणुकांसाठी जारी केलेल्या मतदार यादी कार्यक्रमात महत्त्वाचे बदल केले आहेत. २६ नोव्हेंबर रोजी जारी केलेल्या पत्राद्वारे आयोगाने प्रारूप मतदार यादीवरील हरकतींचा निपटारा आणि अंतिम मतदार यादी जाहीर करण्याच्या तारखेत सुधारणा करून नवीन वेळापत्रक प्रसिद्ध केले आहे. निवडणूक प्रक्रियेत पारदर्शकता वाढविणे आणि मतदारांना वेळेत माहिती उपलब्ध करणे हा या निर्णयामागील उद्देश असल्याचे आयोगाने नमूद केले आहे.
नवीन वेळापत्रकानुसार, प्रारूप मतदार यादीवरील हरकतींचा तपास करून प्रभागनिहाय अंतिम यादी प्रसिद्ध करण्याची तारीख १० डिसेंबर २०२५ ऐवजी १५ डिसेंबर २०२५ करण्यात आली आहे. या मुदतवाढीमुळे नोंदणी प्रक्रियेची अधिक काटेकोर पडताळणी करता येणार असल्याची माहिती अधिकृत सूत्रांनी दिली.
त्याचप्रमाणे मतदान केंद्रांवर मतदार यादी उपलब्ध करून देण्याची तारीखही बदलली आहे. ही यादी आता १५ डिसेंबरऐवजी २० डिसेंबर २०२५ रोजी प्रसिद्ध होणार आहे. यामुळे नागरिकांना त्यांच्या नावाची नोंद योग्य मतदान केंद्रावर तपासण्यासाठी अधिक वेळ मिळणार आहे.
दरम्यान, मतदान केंद्रनिहाय अंतिम मतदार यादी जाहीर करण्याची तारीख २२ डिसेंबरवरून २७ डिसेंबर २०२५ पर्यंत पुढे ढकलण्यात आली आहे. यासंबंधीचे अधिकृत पत्र निवडणूक आयोगाचे सचिव सुरेश काकाणी यांनी सर्व महानगरपालिका व संबंधित विभागांना पाठविले आहे.