दोन वर्षांपासून फरार जबरी चोरीतील आरोपी जेरबंद!

जळगाव : धरणगाव पोलिस ठाण्यात दाखल जबरी चोरीच्या गुन्ह्यात मागील दोन वर्षांपासून फरार असलेल्या दोन पाहिजे आरोपींना जळगाव स्थानिक गुन्हे शाखेच्या पथकाने धुळे जिल्ह्यातून अटक केली. अजय भाईदास धोरणात (वय २७, रा. नवलनगर, ता. जि. धुळे) आणि संभाजी बाबू पाटील (वय २६, रा. सातरणे, ता. जि. धुळे) अशी अटक करण्यात आलेल्या आरोपींची नावे आहेत.
पोलीस अधीक्षक श्रीकांत धिवरे यांनी जिल्ह्यातील सर्व पोलिस ठाण्यांच्या प्रभारी अधिकाऱ्यांसह स्थानिक गुन्हे शाखेच्या प्रभारी अधिकाऱ्यांना त्यांच्या कार्यक्षेत्रातील गंभीर गुन्ह्यांमध्ये पाहिजे असलेल्या व फरार आरोपींचा शोध घेऊन त्यांना अटक करण्याच्या सूचना दिल्या होत्या. त्यानुसार स्थानिक गुन्हे शाखेचे वरिष्ठ पोलिस निरीक्षक राहुल गायकवाड यांनी विशेष पथक तयार करून आरोपींचा शोध घेण्याबाबत मार्गदर्शन केले.

गोपनीय माहितीवरून कारवाई
विशेष पथकातील अधिकारी व अंमलदारांना २२ ऑक्टोबर २०२६ रोजी गोपनीय बातमीदारामार्फत माहिती मिळाली की, धरणगाव पोलिस ठाण्यात गुन्हा रजिस्टर क्रमांक ४६०/२०२४, भारतीय न्याय संहिता कलम ३०९(४) अन्वये दाखल असलेल्या जबरी चोरीच्या गुन्ह्यातील दोन आरोपी धुळे जिल्ह्यात असून, ते दोन वर्षांपासून फरार आहेत. या माहितीच्या आधारे पथकाने धुळे जिल्ह्यात जाऊन दोन्ही आरोपींचा शोध घेतला आणि त्यांना ताब्यात घेतले. पुढील कायदेशीर कारवाईसाठी त्यांना धरणगाव पोलिसांच्या ताब्यात देण्यात आले आहे.

वरिष्ठांच्या मार्गदर्शनाखाली मोहीम
ही कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते, चाळीसगाव, उपविभागीय पोलीस अधिकारी सुनील पाटील, चोपडा विभाग आणि स्थानिक गुन्हे शाखेचे वरिष्ठ पोलिस निरीक्षक राहुल गायकवाड यांच्या मार्गदर्शनाखाली करण्यात आली.
या मोहिमेत पोलिस उपनिरीक्षक संतोष पवार, पोलीस हवालदार हरीलाल पाटील, पोलीस कर्मचारी विशेष सोनवणे, पोलीस नाईक राहुल कोळी, पोलीस शिपाई विलास गायकवाड आणि चालक महेश सोमवंशी यांच्या पथकाने सहभाग घेतला. फरार आरोपींचा शोध घेऊन त्यांना अटक करण्याच्या या कारवाईमुळे जळगाव स्थानिक गुन्हे शाखेची उल्लेखनीय कामगिरी पुन्हा एकदा अधोरेखित झाली आहे.