गुजरातचे मुख्यमंत्री विजय रुपाणी यांनी मुख्यमंत्री पदाचा राजीनामा दिला आहे. रुपाणी पदावरुन पायउतार झाल्यावर पुढचा मुख्यमंत्री कोण होणार यामध्ये अनेक नावांची चर्चा सुरु होती. परंतु घाटलोदियाचे प्रतिनिधीत्व करणारे भूपेंद्र पटेल यांच्या नावावर भाजपच्या बैठकीत एकमत झालं आहे. भूपेंद्र पटेल आता गुजरातचे नवे मुख्यमंत्री होणार असून याबाबत औपचारिक घोषणा थोड्याच वेळात करण्यात येणार आहे. भाजपच्या सर्व आमदार आणि केंद्रिय नेतृत्वाच्या उपस्थितीमध्ये नवे मुख्यमंत्री कोण होणार याबाबत चर्चा सुरु होती. अखेर सर्वांनुमते पटेल यांच्या नावावर शिक्कामोर्तब झाला असून गुजरातला आता नवा मुख्यमंत्री मिळाला आहे. यावेळी गुजरातचे प्रदेशाध्यक्ष सीआर पाटील, माजी मुख्यमंत्री विजय रुपाणी, उपमुख्यमंत्री नितीन पटेल आणि केंद्रिय मंत्री नरेंद्र सिंह तोमर उपस्थित होते.
गुजरातचे नवे मुख्यमंत्री भूपेंद्र पटेल हे अमदाबाद महानगरपालिकामध्ये माजी स्थायी समिती अध्यक्ष राहिले आहेत. मुख्यमंत्री पदाच्या शर्यतीमध्ये अनेक नावे होती. काही नावे ही प्रबळ दावेदार होती परंतु भूपेंद्र पटेल यांच्या नावावर एकमत झालं असल्यामुळे राजकीय वर्तुळात खळबळ माजली आहे. केंद्रीय मंत्री नरेंद्र सिंह तोमर यांनी भूपेंद्र पटेल यांच्या नावाची घोषणा केली आहे. पटेल हे गुजरातच्या माजी मुख्यमंत्री आनंदीबेन पटेल यांच्या जवळचे मानले जातात. आनंदीबेन यांच्या राजीनाम्यानंतर विजय रुपाणींना मुख्यमंत्री करण्यात आले होते.
