लाडक्या बहिणींना मार्च-एप्रिलचा हप्ता अद्याप प्रतीक्षेत; 4500 रुपये एकत्र मिळण्याची शक्यता
मुंबई : विधानसभा निवडणुकीपूर्वी जाहीर झालेली आणि महायुती सरकारसाठी गेमचेंजर ठरलेली मुख्यमंत्री लाडकी बहीण योजना पुन्हा चर्चेत आली आहे. मार्च 2026 आणि एप्रिल 2026 या दोन महिन्यांचे हप्ते अद्याप लाभार्थी महिलांच्या खात्यात जमा झाले नसल्याने महिलांमध्ये संभ्रमाचे वातावरण आहे.
या योजनेसाठी ई-केवायसी (eKYC) प्रक्रिया पूर्ण करण्याची अंतिम मुदत 30 एप्रिल 2026 पर्यंत वाढवण्यात आली होती. यापूर्वी ही मुदत 31 मार्चपर्यंत होती. महिला व बाल विकास मंत्री Aditi Tatkare यांनी मुदतवाढ जाहीर केली होती. मात्र, अनेक महिलांनी eKYC पूर्ण करूनही मार्च आणि एप्रिल महिन्याचा हप्ता अद्याप मिळालेला नाही.
मिळालेल्या माहितीनुसार, मे महिन्यातील मंत्रिमंडळ बैठकीत यासंदर्भात निर्णय होण्याची शक्यता आहे. मंजुरी मिळाल्यानंतर लाभार्थी महिलांच्या खात्यात थेट पैसे जमा केले जाणार आहेत. मात्र, सरकारकडून अद्याप अधिकृत घोषणा करण्यात आलेली नाही.
दरम्यान, महिलांमध्ये आता दोन महिन्यांचे 3000 रुपये मिळणार की मार्च, एप्रिल आणि मे असे तीन महिन्यांचे मिळून 4500 रुपये एकत्र जमा होणार, याबाबत उत्सुकता आहे. महिला व बाल विकास विभागाकडून eKYC पडताळणी प्रक्रिया सुरू असून ती पूर्ण झाल्यानंतरच निधी वितरण होणार असल्याची माहिती समोर येत आहे.
या योजनेअंतर्गत पात्र महिलांच्या खात्यात दरमहा 1500 रुपये जमा केले जातात. मात्र, योजनेत अपात्र आणि बोगस लाभार्थी आढळल्यानंतर सरकारने पडताळणी प्रक्रिया अधिक कठोर केली आहे. अडीच लाख रुपयांपेक्षा अधिक उत्पन्न असलेल्या काही महिला तसेच सरकारी कर्मचाऱ्यांनीही लाभ घेतल्याचे समोर आल्यानंतर eKYC अनिवार्य करण्यात आले. त्यामुळे eKYC न केलेल्या अनेक महिलांचा लाभ आधीच बंद करण्यात आला आहे.
