मुंबई : निवडणूक निर्णय अधिकाऱ्यांच्या विरोधात दाखल अपिलांवर न्यायालयाचा अंतिम आदेश न झाल्यामुळे राज्य निवडणूक आयोगाने १२ जिल्ह्यांतील नगरपालिका आणि नगरपंचायतींच्या एकूण ३५ प्रभागांतील निवडणूक प्रक्रिया पुढील आदेश येईपर्यंत स्थगित ठेवण्याचा निर्णय घेतला आहे. त्यामुळे या प्रभागांमध्ये २ डिसेंबरला होणारे मतदान आता होणार नाही.
याशिवाय, उमेदवारांच्या मृत्यूमुळे आणखी तीन प्रभागातील निवडणुकीला स्थगिती देण्यात आली आहे.
राज्यातील २४६ नगरपालिका आणि ४२ नगरपंचायतींच्या निवडणुकीची तयारी अंतिम टप्प्यात पोहोचली आहे. मात्र, छाननीदरम्यान अवैध ठरलेल्या अर्जांविरोधात काही उमेदवारांनी दाखल केलेल्या अपिलांची जिल्हा न्यायालयात अजून सुनावणी सुरू आहे किंवा अद्याप निर्णय झालेले नाही. अशा परिस्थितीत उमेदवारांना निवडणूक चिन्हाचे वाटपही करता येणार नाही, म्हणून आयोगाने ही निवडणूक थांबविण्याचा निर्णय घेतला आहे.
उमेदवारी अर्ज दाखल करण्याची प्रक्रिया १० ते १७ नोव्हेंबरदरम्यान झाली होती, तर अर्ज छाननीची तारीख १८ नोव्हेंबर होती.
ज्या प्रभागांत अपिल नव्हते, तेथे अर्ज माघारीची अंतिम मुदत २१ नोव्हेंबर, तर अपिल दाखल असलेल्या प्रभागांत २५ नोव्हेंबर २०२५ निश्चित करण्यात आली होती.
मात्र, अर्ज माघारीची मुदत संपल्यानंतरही ३५ प्रभागांतील अपिलांवर न्यायालयाचा अंतिम निर्णय न आल्याने आयोगाला निवडणुका स्थगित करण्याशिवाय पर्याय उरला नाही. या संदर्भातील आदेश राज्य निवडणूक आयोगाने सर्व जिल्हाधिकाऱ्यांना पाठवले आहेत.
