जामनेर नगराध्यक्ष निवडणूक वादात; साधना महाजन यांची बिनविरोध निवड धोक्यात?

जामनेर – नगरपरिषद निवडणुकीत मंत्री गिरीश महाजन यांच्या पत्नी साधना महाजन यांची तसेच नऊ नगरसेवकांची बिनविरोध निवड निश्चित झाली असली तरी, महाविकास आघाडीने ही प्रक्रिया न्यायालयात आव्हान दिल्याने परिस्थिती उलटू शकते. नगराध्यक्षपदासाठी एकूण चार महिला उमेदवार पात्र ठरल्या होत्या. मात्र, अर्ज माघारीच्या दिवशी महाविकास आघाडीच्या तिन्ही उमेदवारांनी अचानक मागे हटत साधना महाजन यांच्या बिनविरोध निवडीचा मार्ग मोकळा केला. या निर्णयाबाबत आपल्याला विश्वासात न घेतल्याचा आरोप आघाडीच्या नेत्यांकडून करण्यात येत आहे.

पुढे, निवडणूक आयोगाने रात्रीतून सूचकांची संख्या बदलल्याचा आरोपही समोर आला आहे. महाविकास आघाडीची डमी उमेदवार ज्योत्स्ना विसपुते यांचा अर्ज ‘एकच सूचक’ असल्याच्या कारणावरून बाद ठरवण्यात आला. त्यानंतर मुख्य उमेदवार प्रतिभा झाल्टे माघार घेतल्याने आघाडीकडून एकही अर्ज शिल्लक राहिला नाही. याच निर्णयाविरोधात विसपुते यांनी जिल्हा सत्र न्यायालयात अपील दाखल केले आहे. दरम्यान, पाचोऱ्यात अशाच सूचक प्रकरणात एका उमेदवाराला न्यायालयाकडून दिलासा मिळाल्याने जामनेरमधील दावाही बळकट झाल्याचे विरोधकांच्या वर्तुळात बोलले जात आहे.