देशभरात यंदा सरासरीपेक्षा जास्त पाऊस झाल्याने अनेक राज्यांना मोठ्या नुकसानीचा सामना करावा लागला. महाराष्ट्रातही पावसामुळे मोठे नुकसान झाले. आता पुन्हा एकदा वातावरणात मोठे बदल होत असून नव्या चक्रीवादळाची निर्मिती झाल्याची माहिती समोर आली आहे.
‘सेन्यार’नंतर बंगालच्या उपसागरात ‘डिटवाह’ नावाचे नवे चक्रीवादळ तयार झाले आहे. यमनने या तुफानाला ‘डिटवाह’ असे नाव दिले आहे. भारतीय हवामान विभागानुसार हे चक्रीवादळ ३० नोव्हेंबरपर्यंत तामिळनाडू, पुद्दुचेरी आणि दक्षिण आंध्र प्रदेशच्या किनाऱ्यावर धडकण्याची शक्यता व्यक्त करण्यात आली आहे.
चक्रीवादळ सेन्यार निकोबार बेटांच्या उत्तरेस सुमारे ८५० किमी अंतरावर कमी दाबाच्या क्षेत्रात रुपांतरित होण्याची शक्यता आहे. दरम्यान, नव्या ‘डिटवाह’ चक्रीवादळाची तीव्रता वाढत असून ते उत्तर-पश्चिमेकडे सरकत आहे, अशी माहिती IMDने दिली आहे.
या चक्रीवादळाचा परिणाम म्हणून तामिळनाडू, पुद्दुचेरी आणि आंध्र प्रदेशच्या किनारपट्टीस जोरदार ते मुसळधार पावसाचा ‘ऑरेंज अलर्ट’ जारी करण्यात आला आहे. चेन्नईसह दक्षिणेकडील अनेक जिल्ह्यांमध्ये पावसाचा धोका वर्तवण्यात आला आहे.
🌧 महाराष्ट्राची काय परिस्थिती?
महाराष्ट्रासाठी सध्या पावसाचा कोणताही इशारा देण्यात आलेला नसला तरी, तापमानात घट होऊन पठारी भागात थंडीची लाट जाणवू शकते, असा अंदाज हवामान खात्याने व्यक्त केला आहे.
❄ उत्तर भारतात कडाक्याची थंडी
उत्तर भारतात थंडीचा कडाका वाढण्याची शक्यता असून, मध्य भारतातही तापमानात झपाट्याने घट होणार आहे.
