रावेर: तालुक्यातील एका धनाढ्य व्यक्तीकडून सातत्याने पैसे उकळणाऱ्या महिलेला एक लाख रुपये स्वीकारताना रंगेहात पकडण्यात आले. या घटनेमुळे संपूर्ण परिसरात मोठी चर्चा सुरू आहे.
मैत्रीपासून ब्लॅकमेलिंगपर्यंतचा प्रवास
२०१८ मध्ये रावेर तालुक्यातील एका इसमाने आपल्या कारने जळगावला जात असताना, ४३ वर्षीय महिलेने लिफ्ट मागितली. प्रवासादरम्यान दोघांमध्ये ओळख वाढली आणि नंतर मैत्री झाली. पुढे त्या महिलने सदर इसमाला घरी जेवणासाठी बोलावले आणि कोल्ड्रिंकमध्ये गुंगीचे औषध मिसळून त्याला बेशुद्ध केले. यानंतर त्याने शारीरिक संबंधांचा बनाव करत त्याचा व्हिडिओ चित्रित केला आणि सोशल मीडियावर व्हायरल करण्याची धमकी देऊन पैसे उकळण्यास सुरुवात केली.
सातत्याने खंडणीची मागणी
भीतीपोटी इसमाने वारंवार तिच्या मागण्या पूर्ण केल्या. २३ डिसेंबर २०२३ पासून महिलेच्या व तिच्या मुलाच्या खात्यात फोन-पेद्वारे तब्बल ११ लाख रुपये ट्रान्सफर करण्यात आले. तरीही तिची पैशांची भूक वाढत गेली. २१ फेब्रुवारी २०२५ रोजी तिने ५ कोटी रुपये घेतल्याचा करारनामा इसमाकडून लिहून घेतला. यामुळे त्रस्त झालेल्या पीडित व्यक्तीने अखेर पोलिसांकडे धाव घेतली.
सापळा रचून रंगेहात अटक
या तक्रारीनंतर रावेर पोलीस ठाण्याचे निरीक्षक डॉ. विशाल जयस्वाल यांच्या मार्गदर्शनाखाली सहाय्यक पोलीस निरीक्षक अंकुश जाधव, महिला पोलीस उपनिरीक्षक प्रिया वसावे, महिला पोलीस माधवी सोनवणे आणि अन्य पोलिसांनी सापळा रचला. बुधवारी दुपारी ३.१५ वाजता, रावेर-बऱ्हाणपूर मार्गावरील एसएसबीटी मार्टच्या मागे इसमाला एक लाख रुपये आणायला बोलावले असता, त्या महिलेला रोख रक्कम स्वीकारताना रंगेहात अटक करण्यात आली. या प्रकरणी रावेर पोलीस ठाण्यात गुन्हा दाखल करण्यात आला असून, सहाय्यक पोलीस निरीक्षक अंकुश जाधव पुढील तपास करत आहेत. या महिलेने यापूर्वीही इतरांना अशाच जाळ्यात अडकवले आहे का, याबाबत पोलीस तपास सुरू आहे.
