सिल्व्हरलाइन टेक्नॉलॉजीजमध्ये 80 कोटींची गुंतवणूक; एआय विस्ताराला गती
भारतीय आयटी क्षेत्रातील सिल्व्हरलाइन टेक्नॉलॉजीज कंपनी सध्या महत्त्वाच्या व्यावसायिक घडामोडींमुळे चर्चेत आहे. संयुक्त अरब अमिरातीतील ट्रूलेजर टेक्नॉलॉजीज या कंपनीने सिल्व्हरलाइनमध्ये सुमारे 80 कोटी रुपयांची धोरणात्मक गुंतवणूक करण्याची इच्छा व्यक्त केली आहे. हा व्यवहार पूर्ण झाल्यास कंपनीचे मूल्यांकन सुमारे 400 कोटी रुपयांपर्यंत पोहोचण्याची शक्यता आहे. एआय क्षेत्रातील प्रकल्पांना मिळत असलेला चांगला प्रतिसाद आणि वाढता व्यवसाय लक्षात घेता ही गुंतवणूक कंपनीसाठी महत्त्वाची ठरणार आहे.
या प्रस्तावावर अंतिम निर्णय घेण्यासाठी 18 फेब्रुवारी 2026 रोजी संचालक मंडळाची बैठक होणार आहे. ट्रूलेजर टेक्नॉलॉजीजला कंपनीत 20 टक्के भागीदारी घ्यायची आहे. या गुंतवणुकीमुळे सिल्व्हरलाइनची आर्थिक क्षमता वाढेल आणि तंत्रज्ञान विस्तारासाठी आवश्यक निधी उपलब्ध होईल. या बातमीचा सकारात्मक परिणाम शेअर बाजारातही दिसून आला असून, 13 फेब्रुवारी 2026 रोजी कंपनीचा शेअर 5 टक्क्यांनी वाढून 15.4 रुपयांवर बंद झाला.
दरम्यान, 2 फेब्रुवारी 2026 रोजी कंपनीने ‘SilverAI’ हा एआय-आधारित वेब प्लॅटफॉर्म लॉन्च केला. या प्लॅटफॉर्मला सुरुवातीपासूनच चांगला प्रतिसाद मिळाला असून, अवघ्या आठवडाभरात 24 हजारांपेक्षा अधिक वापरकर्त्यांनी नोंदणी केली आहे. पुढील 45 दिवसांत वापरकर्त्यांची संख्या 5 लाखांपर्यंत वाढवण्याचे उद्दिष्ट कंपनीने ठेवले आहे.
‘प्रो’ सदस्यत्वाची किंमत दरमहा 9 डॉलर (सुमारे 750 रुपये) निश्चित करण्यात आली आहे. जर 5 लाख वापरकर्त्यांनी सशुल्क सदस्यत्व स्वीकारले, तर वार्षिक महसूल 430 ते 450 कोटी रुपयांपर्यंत जाऊ शकतो, असा अंदाज आहे. 10 टक्के कन्व्हर्जन दर गृहित धरल्यास सुमारे 43 कोटी, तर 20 टक्के दर असल्यास सुमारे 86 कोटी रुपयांचा महसूल मिळू शकतो.
वापरकर्त्यांना आकर्षित करण्यासाठी कंपनीने ‘प्रो’ आवृत्ती पुढील सहा महिन्यांसाठी मोफत उपलब्ध करून दिली आहे. भारतातील एआय चॅटबॉट बाजारपेठ 2031 पर्यंत 26.4 अब्ज डॉलर्सपर्यंत वाढेल, असा अंदाज व्यक्त केला जात असून, या वाढीचा फायदा घेण्यासाठी सिल्व्हरलाइन आपली रणनीती तयार करत आहे.
आर्थिक कामगिरीच्या दृष्टीने पाहता, चालू आर्थिक वर्षाच्या पहिल्या सहामाहीत कंपनीने 200.16 कोटी रुपयांचा महसूल नोंदवला असून निव्वळ नफा 18.41 कोटी रुपये झाला आहे. दुसऱ्या तिमाहीत महसुलात मागील वर्षाच्या तुलनेत शंभरपट वाढ झाल्याचे कंपनीने सांगितले आहे. 1992 मध्ये स्थापन झालेली सिल्व्हरलाइन टेक्नॉलॉजीज आता एआय आणि क्लाउड तंत्रज्ञानाच्या जोरावर जागतिक बाजारपेठेत आपले स्थान अधिक मजबूत करण्याच्या दिशेने वाटचाल करत आहे.
