जळगाव महानगरपालिकेला भाजपकडून निवेदन

जळगाव : जळगाव महानगरपालिका सार्वत्रिक निवडणूक २०२५-२६ संदर्भातील प्रारूप मतदार याद्या २० नोव्हेंबर २०२५ रोजी जाहीर झाल्यानंतर त्यामध्ये मोठ्या प्रमाणावर गंभीर त्रुटी आढळून येत असल्याने भारतीय जनता पार्टी, जळगाव महानगरतर्फे आज महापालिका सहाय्यक आयुक्त सौ. धनश्री शिंदे यांना निवेदन देण्यात आले.
प्रारूप याद्यांचे परीक्षण करताना अनेक नागरिकांची नावे चुकीच्या प्रभागात नोंदली गेल्याचे, एकाच व्यक्तीची नावे दोन ते तीन ठिकाणी दिसत असल्याचे, मतदारांच्या छायाचित्रांमध्ये चुका असल्याचे, पूर्ण कुटुंबांना चुकीच्या प्रभागात स्थलांतरित दाखविण्यात आल्याचे तसेच मृत व्यक्तींची नावे अद्यापही यादीत असल्याचे समोर आले आहे. प्रशासनाच्या निष्काळजीपणामुळे झालेल्या या त्रुटींमुळे नागरिकांमध्ये संभ्रम व नाराजी पसरली आहे.
महानगरपालिकेत दुरुस्तीसाठी फॉर्म उपलब्ध असला, तरी प्रत्येक नागरिकाने संपूर्ण माहिती स्वतः भरावी लागत असल्याने प्रक्रिया वेळखाऊ व किचकट ठरत आहे. प्रत्येक प्रभागात किमान २००० ते ३००० त्रुटी असल्याने सर्व नागरिकांनी स्वतंत्र फॉर्म भरून दुरुस्ती करणे प्रत्यक्षात शक्य नसल्याचे भाजपने निदर्शनास आणून दिले.
मतदारयादी अचूक, अद्ययावत व त्रुटीविरहित असल्यासच निवडणूक प्रक्रिया पारदर्शक होते. मात्र सध्याच्या परिस्थितीत केवळ नियमित हरकतींवर आधारित दुरुस्त्या करून मोठ्या प्रमाणातील त्रुटी दूर होणे अशक्य असल्याने प्रभागनिहाय प्रत्यक्ष पाहणी अत्यावश्यक आहे, असे निवेदनात नमूद करण्यात आले.
या पार्श्वभूमीवर महानगरपालिकेच्या सर्व प्रभागांमध्ये ‘मतदार यादी दुरुस्ती विशेष मोहीम’ राबविणे, हरकती दाखल करण्यासाठी मुदतवाढ देणे व चुकीची नावे, दुबार नोंदी, चुकीचे प्रभाग, हरवलेली माहिती यांची घरोगरी जाऊन तपासणी करण्यासाठी स्वतंत्र विशेष सर्वेक्षण पथक नेमावे, अशी मागणी भाजपकडून करण्यात आली.
निवेदन देताना जिल्हाध्यक्ष दिपक प्रभाकर सूर्यवंशी, सरचिटणीस नितीन इंगळे, राहुल वाघ, पितांबर भावसार, मिलिंद चौधरी, भूषण लाडवंजारी, रेखा वर्मा, गोपाळ पोपटानी, शक्ती महाजन, महिला मोर्चा प्रमुख नितु परदेशी, मंडळाध्यक्ष आनंद सपकाळे, दीपमाला काळे, विनोद मराठे, अजित राणे, अतुल बारी, जेष्ठ आघाडी प्रमुख महेश कापुरे, माजी नगरसेवक जितेंद्र मराठे, कैलास सोनवणे, सुचिता हाडा, अमित काळे, महेश चौधरी, अश्विन सैंदाणे, तिलोत्तमा पाटील, निलेश तायडे, धनंजय पाटील, सुनील भारंबे, दिनेश अत्तरडे, अमोल धांडे आदी पदाधिकारी व मोठ्या संख्येने कार्यकर्ते उपस्थित होते.