भारताकडून बांगलादेशला डिझेलचा दिलासा
मैत्री पाइपलाइनद्वारे ५ हजार टनांची पहिली खेप रवाना
नवी दिल्ली / ढाका :
पश्चिम आशियातील वाढत्या युद्धजन्य परिस्थितीमुळे जागतिक ऊर्जा सुरक्षेवर ताण निर्माण झाला असताना भारताने बांगलादेशला मोठा दिलासा दिला आहे. द्विपक्षीय करारांतर्गत भारताने ‘भारत–बांगलादेश मैत्री पाइपलाइन’ (IBFP) द्वारे ५,००० टन डिझेलची पहिली खेप बांगलादेशकडे रवाना केली आहे. माजी पंतप्रधान शेख हसीना यांच्या पदच्युतीनंतर दोन्ही देशांतील ऊर्जा सहकार्य काहीसे ताणले गेले होते. मात्र, या पावलामुळे भारत–बांगलादेश संबंध पुन्हा सुरळीत होत असल्याचे संकेत मिळत आहेत.
ऊर्जा टंचाईवर मात करण्यासाठी मदत
इराण, इस्रायल आणि अमेरिका यांच्यातील वाढत्या तणावामुळे जागतिक तेलपुरवठ्यावर परिणाम झाला आहे. त्याचा मोठा फटका बांगलादेशला बसला असून देशात इंधनाची कमतरता जाणवू लागली आहे. या पार्श्वभूमीवर आसाममधील नुमालीगड रिफायनरीतून पाइपलाइनमार्फत डिझेल पाठवण्यास सुरुवात करण्यात आली आहे. बांगलादेश पेट्रोलियम कॉर्पोरेशनचे (BPC) अध्यक्ष मोहम्मद रेझानूर रहमान यांनी दिलेल्या माहितीनुसार, ५,००० टन डिझेलची ही खेप मंगळवारी दिनाजपूर जिल्ह्यातील पर्बतीपूर डेपोमध्ये पोहोचणार आहे.
करारानुसार वार्षिक पुरवठा
भारत आणि बांगलादेश यांच्यातील करारानुसार दरवर्षी सुमारे १ लाख ८० हजार टन डिझेल पाइपलाइनद्वारे पुरवठा करण्याचे उद्दिष्ट आहे. त्यापैकी पुढील सहा महिन्यांत किमान ९० हजार टन डिझेल बांगलादेशला पाठवले जाणार आहे. मार्च २०२३ मध्ये पंतप्रधान नरेंद्र मोदी आणि तत्कालीन पंतप्रधान शेख हसीना यांनी या पाइपलाइनचे उद्घाटन केले होते. या प्रकल्पामुळे रेल्वे टँकरच्या तुलनेत कमी खर्चात आणि अधिक वेगाने इंधन वाहतूक शक्य झाली आहे.
राजकीय बदलानंतर संबंध पुन्हा सुरळीत
ऑगस्ट २०२४ मध्ये शेख हसीना सरकार कोसळल्यानंतर अंतरिम सरकारने भारताशी केलेल्या काही ऊर्जा करारांवर पुनर्विचार सुरू केला होता. झारखंडमधील अदानी समूहाच्या प्रकल्पातून होणाऱ्या वीजपुरवठ्यावरही त्याचा परिणाम झाला होता. मात्र, सध्या ढाका येथे बीएनपीचे नेते तारिक रहमान यांच्या नेतृत्वाखालील सरकार सत्तेत आल्यानंतर दोन्ही देशांतील संबंध पुन्हा सुधारताना दिसत आहेत.
बांगलादेशात इंधन संकट
बांगलादेश आपल्या गरजेपैकी सुमारे ९५ टक्के इंधन आयातीवर अवलंबून आहे. त्यातील मोठा हिस्सा मध्यपूर्व देशांतून येतो. पर्शियन आखातातील होर्मुझ सामुद्रधुनीतील तणावामुळे इंधनपुरवठ्यावर परिणाम झाला असून बांगलादेशात काही ठिकाणी इंधनाचे रेशनिंग सुरू करण्यात आले आहे. दुचाकींसाठी १० लिटर तर कारसाठी ४० लिटरची मर्यादा निश्चित करण्यात आली असून अनेक पेट्रोल पंपांवर वाहनांच्या लांबच लांब रांगा दिसत आहेत.
