जळगाव बाजार समितीत ‘दादर’ला विक्रमी दर; शेतकऱ्यांना दिलासा

जळगाव : रब्बी हंगामातील पिकांच्या काढणीला सुरुवात होताच जळगाव कृषी उत्पन्न बाजार समितीत विविध पिकांची मोठ्या प्रमाणावर आवक सुरू झाली आहे. यंदा गहू, हरभरा आणि मक्याची लागवड मोठ्या प्रमाणावर झाली असली तरी बाजारात सर्वाधिक चर्चेत असलेले पीक म्हणजे ‘दादर’ ठरत आहे. कमी लागवड आणि वाढलेली मागणी यामुळे या पिकाला विक्रमी दर मिळत असून शेतकऱ्यांना मोठा दिलासा मिळाला आहे.

१६ मार्च रोजी बाजार समितीत दादरला शासनाने निश्चित केलेल्या ₹३,४२१ हमीभावाच्या तुलनेत तब्बल ₹५,१०० प्रति क्विंटल दर मिळाला. हमीभावापेक्षा सुमारे दोन हजार रुपयांनी अधिक भाव मिळाल्याने दादर उत्पादक शेतकरी आनंदित झाले आहेत.

यंदा दादरचे लागवड क्षेत्र कमी राहिल्यामुळे बाजारात त्याची आवक मर्यादित आहे. मात्र मागणी वाढल्याने दरात मोठी तेजी दिसून येत आहे. एका दिवसात सुमारे १७०० क्विंटल दादरची आवक झाली असून वाढलेल्या दरामुळे बाजार समितीत शेतकऱ्यांची मोठी गर्दी पाहायला मिळाली.

दरम्यान, इतर पिकांचे दर तुलनेने स्थिर असल्याचे दिसून येत आहे. हरभऱ्याला ४,८०० ते ५,००० रुपये दर मिळत असून मेक्सिको हरभऱ्याला ८,६०० रुपयांपर्यंत भाव मिळत आहे. सोयाबीनला सुमारे ₹५,३४५ तर गव्हाला ₹२,३५० दर मिळत असल्याची माहिती बाजार समिती प्रशासनाने दिली आहे.

गहू, हरभरा आणि मक्याची लागवड यंदा मोठ्या प्रमाणावर झाली असली तरी दादरचे क्षेत्र कमी असल्याने बाजारात मागणी वाढून दरात मोठी उसळी आल्याचेही प्रशासनाने स्पष्ट केले.