शिमल्यात दरड कोसळून बसला अपघात; जळगावच्या महिलेचा मृत्यू, १५ जखमी

जळगाव : हिमाचल प्रदेशात मुसळधार पावसामुळे दरड कोसळून झालेल्या भीषण अपघातात जळगाव जिल्ह्यातील सौ. लक्ष्मी विराणी यांचा मृत्यू झाला आहे. ही दुर्घटना शिमला जिल्ह्यातील रामपूर तालुक्यातील हिंदुस्तान-तिबेट मार्गावरील बिथल (कालीमिट्टी) परिसराजवळ घडली.

पर्यटकांनी भरलेल्या एका खाजगी बसवर अचानक डोंगरावरून प्रचंड दगड कोसळले. या घटनेत दोन महिलांचा मृत्यू झाला असून १५ प्रवासी जखमी झाले आहेत. मृतांपैकी एक जळगाव जिल्ह्यातील असल्याची पुष्टी जिल्हाधिकारी कार्यालयाकडून करण्यात आली आहे.

जखमींना तात्काळ महात्मा गांधी वैद्यकीय सेवा केंद्र, खानरी (रामपूर उपजिल्हा) येथे दाखल करण्यात आले आहे. मृतदेह रामपूर उपजिल्हा रुग्णालयात ठेवण्यात आला असून वैद्यकीय तपासणीनंतर तो त्यांच्या सहकाऱ्यांच्या ताब्यात देण्यात येणार आहे. या संदर्भात जळगाव जिल्हा प्रशासन शिमला जिल्हा प्रशासनाशी सतत संपर्कात आहे.