जळगाव ;- शहरातील अयोध्या नगरात एका २८ वर्षीय तरूणाने राहत्या घरात गळफास घेवून आत्महत्या केल्याची घटना शुक्रवार २० ऑक्टोबर रोजी रात्री साडे अकरा वाजेच्या सुमारास उघडकीस आली असून आत्महत्या करण्याचे कारण अद्याप समजू शकले नाही . याबाबत एमआयडीसी पोलीस स्टेशनला अकस्मात मृत्यूची नोंद करण्यात आली आहे.
विशाल तुकाराम चौधरी (वय-२८, रा. अयोध्या नगर, जळगाव) असे मयत तरूणाचे नाव आहे.विशाल हा गेल्या दोन महिन्यांपासून एमआयडीसीतील सुप्रीम कंपनीत कामाला होता. शुक्रवार २० ऑक्टोबर रोजी रात्री ८ ते १० वाजेच्या दरम्यान गल्लीतील नवरात्रोत्सवाच्या कार्यक्रमात विशाल चौधरी याने सहभाग घेतला होता.मात्र यानंतर त्याने घरात कुणीही नसतांना किचन रूममध्ये दोरीने गळफास घेवून आत्महत्या केली.
त्याची पत्नी हर्षाली या घरात आल्या असता पती विशाल चौधरी यांनी गळफास घेतल्याचे दिसून आले. गळफास घेतलेल्या अवस्थेत पतीचा मृतदेह पाहताच तीने एकच आक्रोश केला. आवाज एकूण शेजारी राहणाऱ्या नागरीक व तरूणांनी धाव घेवून विशालचा मृतदेह तातडीने खाली उतरवत शासकीय वैद्यकीय महाविद्यालयात दाखल केलं असता वैद्यकीय अधिकारी डॉ. निरंजन देशमुख यांनी मयत घोषीत केले. याबाबत एमआयडीसी पोलीस ठाण्यात अकस्मात मृत्यूची नोंद करण्यात आली आहे. पुढील प्राथमिक तपास पोहेकॉ सचिन मुंढे, पोहेकॉ आकाश परदेशी करत आहे.
मयताच्या पश्चात आई सुषमा, वडील तुकाराम चौधरी, भाऊ चिराग, पत्नी हर्षाली आणि तीन वर्षाची मुलगी ऐशीका असा परिवार आहे. दरम्यान या घटनेमुळे परिसरात हळहळ व्यक्त होत आहे.
