गोदावरी तंत्रनिकेतनतर्फे आरंभ (इंडक्शन) कार्यक्रम उत्साहात

जळगाव :  गोदावरी फाउंडेशन संचलित गोदावरी तंत्रनिकेतन, जळगाव येथे नव्याने प्रवेश घेतलेल्या प्रथम वर्षाच्या तंत्रनिकेतन विद्यार्थ्यांसाठी आरंभ (इंडक्शन) कार्यक्रम २०२६-२७ चे १७ व १८ ऑगस्ट २०२६ रोजी आयोजन करण्यात आले. विद्यार्थ्यांना महाविद्यालयीन वातावरण, शैक्षणिक पद्धती, उपलब्ध संधी तसेच विद्यार्थी म्हणून असलेल्या जबाबदाऱ्यांची ओळख करून देणे हा कार्यक्रमाचा मुख्य उद्देश होता.

कार्यक्रमाची सुरुवात सरस्वती पूजन आणि नव्याने प्रवेश घेतलेल्या विद्यार्थ्यांच्या स्वागताने झाली. गोदावरी फाउंडेशन संचलित गोदावरी अभियांत्रिकी महाविद्यालयाचे प्राचार्य डॉ. विजयकुमार पाटील यांनी विद्यार्थ्यांना मार्गदर्शन करताना नवीन गोष्टी शिकण्याची वृत्ती, आत्मविश्वास, संवादकौशल्य, व्यक्तिमत्त्व विकास, शिस्त तसेच तांत्रिक व व्यावसायिक कौशल्ये विकसित करण्याचे महत्त्व स्पष्ट केले.

तंत्रनिकेतन समन्वयक प्रा. दीपक झांबरे यांनी महाविद्यालयीन नियम, शैक्षणिक धोरणे, शिस्त, उपस्थिती तसेच विविध शैक्षणिक व सहशैक्षणिक उपक्रमांमध्ये सक्रिय सहभागाचे महत्त्व विद्यार्थ्यांना समजावून सांगितले. महाविद्यालयातील उपलब्ध सुविधा व संधींचा विद्यार्थ्यांनी पुरेपूर उपयोग करावा, असे आवाहन त्यांनी केले.

दुपारच्या सत्रात गोदावरी इन्स्टिट्यूट ऑफ मॅनेजमेंट अँड रिसर्च (GIMR), जळगावचे संचालक डॉ. प्रशांत वारके यांनी ‘Human Values, Creativity and Gender Equality’ या विषयावर मार्गदर्शन केले. मानवी मूल्ये, परस्पर आदर, सर्जनशील विचार, जबाबदार वर्तन आणि समानतेचे महत्त्व त्यांनी विद्यार्थ्यांना समजावून सांगितले.

यानंतर विविध समित्यांची ओळख, प्रथम वर्ष विभागातील प्राध्यापकांशी परिचय तसेच विद्यार्थ्यांमधील क्षमता ओळखून त्यांचा विकास करण्याबाबत मार्गदर्शन करण्यात आले.

पालक मेळाव्यात सकारात्मक संवाद

कार्यक्रमाच्या दुसऱ्या दिवशी पालक मेळाव्याचे आयोजन करण्यात आले. प्रथम वर्षाच्या विद्यार्थ्यांचे पालक मोठ्या संख्येने उपस्थित होते. डॉ. विजयकुमार पाटील यांनी पालकांना मार्गदर्शन करताना विद्यार्थ्यांचा सर्वांगीण विकास ही विद्यार्थी, पालक आणि प्राध्यापक या तिघांची संयुक्त जबाबदारी असल्याचे सांगितले. पालकांनी विद्यार्थ्यांना योग्य पाठिंबा देऊन त्यांच्या क्षमता व अडचणी समजून घ्याव्यात आणि त्यांच्याशी सकारात्मक संवाद साधावा, असे त्यांनी स्पष्ट केले.

यावेळी पालकांनी विद्यार्थ्यांच्या विकासाबाबत तसेच संस्थेकडून असलेल्या अपेक्षा व सूचनांबाबत मौल्यवान अभिप्राय दिला. तंत्रनिकेतन समन्वयक प्रा. दीपक झांबरे यांनी विद्यार्थ्यांना योग्य स्वातंत्र्य व आवश्यक अवकाश देणे, त्यांना समजून घेणे आणि त्यांच्याशी नियमित संवाद साधणे महत्त्वाचे असल्याचे सांगितले.

माजी विद्यार्थ्यांकडून अनुभवांचे मार्गदर्शन

यानंतर माजी विद्यार्थ्यांशी संवाद सत्र घेण्यात आले. डिप्लोमा पूर्ण केलेल्या माजी विद्यार्थ्यांनी प्रथम वर्षाच्या विद्यार्थ्यांशी संवाद साधत आपले शैक्षणिक अनुभव, करिअरचा प्रवास, आलेल्या अडचणी तसेच पुढील वाटचालीसाठी उपयुक्त मार्गदर्शन केले.

कार्यक्रमाच्या अंतिम सत्रात ‘K’ Scheme बाबत मार्गदर्शन करण्यात आले. शासकीय तंत्रनिकेतन, जळगावचे प्राचार्य डॉ. पी. पी. चौधरी तसेच अधिष्ठाता प्रा. नितीन पाटील यांनी विद्यार्थ्यांना ‘K’ Scheme, शैक्षणिक रचना, मूल्यमापन पद्धती, क्रेडिट्स आणि तंत्रनिकेतन शिक्षणातील विविध महत्त्वाच्या बाबींची माहिती दिली.

हा दोन दिवसीय कार्यक्रम प्रा. नेहा चौधरी आणि प्रा. हर्षा पाटील, इंडक्शन प्रोग्राम समन्वयक यांच्या समन्वयातून तसेच प्रथम वर्ष विभागातील सर्व प्राध्यापकांच्या सहकार्याने यशस्वीपणे पार पडला. कार्यक्रमाचे सूत्रसंचालन प्रा. वेणू फिरके यांनी केले.

या दोन दिवसीय इंडक्शन कार्यक्रमाला प्रथम वर्ष तंत्रनिकेतनचे विद्यार्थी मोठ्या संख्येने उपस्थित होते. कार्यक्रमातून विद्यार्थी व पालकांना शैक्षणिक तसेच व्यक्तिमत्त्व विकासाबाबत मौल्यवान मार्गदर्शन मिळाले. नव्या शैक्षणिक प्रवासाची सकारात्मक सुरुवात झाल्याने कार्यक्रमाचा समारोप उत्साहपूर्ण वातावरणात झाला.