महावितरणच्या जळगाव मंडळातील ढिसाळ कारभारावर अधीक्षक अभियंता निलंबित

जळगाव :  महाराष्ट्र राज्य वीज वितरण कंपनीच्या (महावितरण) जळगाव मंडळातील वीज वितरण व्यवस्थेतील अनियमितता आणि अपेक्षित कामगिरी न झाल्याप्रकरणी अधीक्षक अभियंता विनोद चंद्रकांत पाटील यांच्यावर निलंबनाची कारवाई करण्यात आली आहे. वाढती वीज बिलांची थकबाकी, प्रलंबित वीज चोरीची प्रकरणे तसेच नादुरुस्त ट्रान्सफॉर्मरच्या समस्येकडे अपेक्षित गांभीर्याने लक्ष न दिल्याचा ठपका त्यांच्यावर ठेवण्यात आला आहे. कोकण प्रादेशिक विभागाचे सहव्यवस्थापकीय संचालक दिलीप जगदाळे यांनी याबाबत आदेश जारी केले आहेत.

जळगाव मंडळातील वीज वितरण व्यवस्थेचा वरिष्ठ अधिकाऱ्यांकडून आढावा घेण्यात आला होता. या पाहणीत मंडळाच्या कार्यक्षेत्रात काही गंभीर त्रुटी आढळून आल्याचे निलंबन आदेशात नमूद करण्यात आले आहे. वीज चोरी रोखणे, थकबाकी वसूल करणे तसेच नादुरुस्त ट्रान्सफॉर्मरची वेळेत दुरुस्ती करून ग्राहकांचा वीजपुरवठा सुरळीत ठेवणे या महत्त्वाच्या बाबींमध्ये अपेक्षित परिणाम साधला गेला नसल्याचे प्रशासनाच्या निदर्शनास आले. जळगाव मंडळाच्या कार्यक्षेत्रात वीज चोरीची तब्बल २१६९ प्रकरणे निदर्शनास आली होती. अशा प्रकरणांमध्ये नियमानुसार तातडीने कारवाई करून कंपनीचा महसूल सुरक्षित करणे अपेक्षित असते. मात्र, अनेक प्रकरणांमध्ये अपेक्षित कार्यवाही झाली नसल्याचा ठपका ठेवण्यात आला आहे. वीज चोरीमुळे महावितरणच्या महसुलावर थेट परिणाम होत असताना एवढ्या मोठ्या प्रमाणावर प्रकरणे प्रलंबित राहणे ही गंभीर बाब मानण्यात आली आहे. या प्रकरणांच्या प्रभावी निपटाऱ्यासाठी आवश्यक पाठपुरावा न झाल्याचेही निलंबन आदेशातील कारणांमध्ये नमूद करण्यात आले आहे.

जळगाव मंडळातील ग्राहकांकडे वीज बिलांची ६७ कोटी रुपयांपेक्षा अधिक थकबाकी असल्याचे आदेशात नमूद करण्यात आले आहे. थकीत वीज बिलांची वसुली करण्यासाठी सातत्यपूर्ण नियोजन आणि प्रभावी अंमलबजावणी अपेक्षित असताना त्यात समाधानकारक प्रगती झाली नसल्याचे प्रशासनाच्या निदर्शनास आले. मोठ्या प्रमाणातील थकबाकीचा थेट परिणाम महावितरणच्या महसुलावर होत असल्याने या बाबीचीही वरिष्ठ पातळीवर गंभीर दखल घेण्यात आली. जळगाव मंडळातील विविध भागांत ट्रान्सफॉर्मर नादुरुस्त होण्याचे प्रमाण वाढले होते. ट्रान्सफॉर्मर बिघाडामुळे अनेकदा ग्राहकांना दीर्घकाळ वीजपुरवठ्यापासून वंचित राहावे लागते. त्यामुळे नादुरुस्त ट्रान्सफॉर्मरची तातडीने दुरुस्ती किंवा आवश्यकतेनुसार बदल करणे अपेक्षित असते. मात्र, या बाबतीतही अपेक्षित कार्यक्षमता दिसून आली नसल्याचे निरीक्षण वरिष्ठ अधिकाऱ्यांनी नोंदविले. महावितरणच्या कर्मचारी सेवा विनियमातील तरतुदींनुसार विनोद पाटील यांच्यावर निलंबनाची कारवाई करण्यात आली आहे. निलंबनाच्या कालावधीत त्यांचे मुख्यालय मुख्य अभियंता, नाशिक परिमंडळ येथे निश्चित करण्यात आले आहे. तसेच निलंबन काळात प्रत्येक सोमवार आणि शुक्रवारी नाशिक येथे उपस्थित राहून हजेरी नोंदविण्याचे निर्देश देण्यात आले आहेत.

जळगाव मंडळाच्या प्रमुख पदावर कार्यरत असलेल्या वरिष्ठ अधिकाऱ्यावर निलंबनाची कारवाई झाल्याने महावितरणच्या प्रशासकीय वर्तुळात या निर्णयाची चर्चा सुरू झाली आहे. या कारवाईनंतर जळगाव मंडळातील वीज वितरण व्यवस्था अधिक कार्यक्षम करण्यासाठी, थकबाकी वसुलीला वेग देण्यासाठी, वीज चोरीच्या प्रकरणांचा निपटारा करण्यासाठी तसेच नादुरुस्त ट्रान्सफॉर्मरची समस्या सोडविण्यासाठी प्रशासनाकडून कोणती पावले उचलली जातात, याकडे जिल्ह्यातील वीज ग्राहकांचे लक्ष लागले आहे.